Lo termometre
Vam tots crebar ! Qu’es pas benleu, qu’es segur !… Mas que far ? Diu mercés zo saubriatz plan perque zo disen pro a la tele : d’en prumier fau demorar chas se, crin-crau barrat en clau, e dreibir sa pòrta a degun. Quand ses barrat dins-t’un pitit apartament, as tòst fach de l’i t’enuiar e l’i fialar dau fiau negre. Totparier, po’es surtir, mas sens t’obludar de prener dins ta pòcha ton « Attestation de déplacement dérogatoire » si de non ’traparias ’ceptament un proces-verbau. Mas fau pas t’apruesmar dau monde que podrias rencontrar, subretot pas los potonar, e quitament pas lor sarrar la man. Po’es ’nar trabalhar, ’nar far quauquas comessions, ’nar veire lo medecin o te ’chaptar de las mertions chas lo farmacian, ’nar dins ta familha si as un « motif familial impérieux », ’nar t’esbrofar defòra rasis chas te e permenar ton chen, nonmas si ses solet. Auria jamai cregut que l’i aguessa tant de chens en vila ; paubras bestias, las planhe : ne’n pòden pus fòrça de far dietz còps per jorn, mai benleu mai, lo torn dau Champ de Julhet.
Quand ses barrada maison e que sabes pas que far de te, per te desnuiar po’es totjorn prener ta temperatura. Per percaucion. Um sap pas. De las vetz… Avia plan un termometre, mas un vielh, un que datava de la darrier guerra. ’Laidonc corguei viste me’n ’chaptar un moderne, de ’qu’ilhs qu’an un pitit vitron dessus e ’na pila dedins.
Bon-es. Mas qu’es pas lo tot : coma se servir de ’quela besunha ? Autres temps qu’eria ’cepte : avias mas lo te conhar dins ton cròs de cuòu. Mas aüei… Urosadament, emb lo termometre, te balhen maitot ’na « Notice explicative » e me pensei que valia mielhs la legir per bien saubre manejar l’engin.
Per començar, te fan un brave dessenh e e, ’pres ’quò, te disen que « le thermomètre est fabriqué en conformité avec les normes EN12470-A1 :20009 et ASTME1112-00 e que lo fabricant es certifiat ISO 9001:2008 et ISO 13485 :2003+AC :2007 ». L’i comprenes ren, mas dau mins sabes que ton termometre a bien estat fach plan coma fau.
’Pres, t’expliquen coma fau l’i te prener per te’n servir. D’en prumier fau poïar sus lo pitit vitron e esperar d’aicianta qu’auves un « bip » e que veses marcat « 1888Eoo ». Esperas. Quand ’quò marca « Lo°C » e que lo « C » parpalheja, ’quò l’i es : po’es te conhar ton termometre ente vòles, que siaïe dins la gòrja, dins lo « rectum », o ben jos l’aissela, mas surtot pas dins l’aurelha… Parlen pas dau cròs de nas… Si lo metes dins ta gòrja fau bien far ’tencion de pas dreibir ton bargador dau mins 5 minutas de temps, e si lo metes dins ton « rectum » fau l’i ’nar bravament perque si de non aurias vite fach de t’endechar. E, segur, si lo metes d’en prumier dins ton cròs de cuòu e que, per cas, vòles lo còp d’apres lo te conhar dins la gòrja, o reciprocament, fau pas t’obludar de bien lo netiar. Me fie qu’ai degut ’chaptar un termometre especiau per dau monde nécis perque te disen maitot de bien far ’tencion de pas golar lo capuchon quand chamnhas la pila e de pas torcer lo termometre…
Un còp ton termometre conhat ente vòles, esperas a penas quauquas pitas minutas e quand auves « bip » sabes còp sec, quitament ’vant de legir, si ’quò vai o si ’quò vai pas. Si lo « bip » fai « Bi−Bi−Bi−Bi » ’quò vai. Mas si fai « Bi-Bi-Bi----- Bi-Bi-Bi----- Bi-Bi-Bi » qu’es meschant : qu’es signe qu’as de la feure ; quand lo surtes d’ente l’as conhat per vite ’visar çò que l’i a d’escrich, si legisses « Lo°C » qu’es n’autre biais de te dire que ’quò vai, mas si legisses « Hi°C » ses borrut : as ’trapat quauqua salopariá, qu’es pas benleu qu’es segur.
Me lancei. Volguei pas lo forrar dins mon « rectum », nimai dins ma gòrja perque demorar siria mas doas minutas sens parlar, qu’es pas possible per me. ’Laidonc lo conhei jos mon bras. Folia esperar 5 minutas. Esperei. Mon còr fasia la gipa-japa : veses pas que ’quò se ’trapa de far « Bi-Bi-Bi----- Bi-Bi-Bi----- Bi-Bi-Bi » ! ’Na minuta. Doas minutas…’N’eternitat e… « Bi−Bi−Bi−Bi ». Sauvada ! Legiguei ma temperatura dins lo vistron : « 35,2 » ! Tenietz mas gens ! Pertant me sentia pas si tant febla… Tornei far un còp, dos còps. Parier : « Bi−Bi−Bi−Bi » e « 35,2 »… Tornei ’trapar la « notice explicative » e l’i legiguei que qu’eria pas lo melhor biais de far perque ’quò metia tròp de temps e qu’eria mas ’na temperatura a quauqua-ren pres. Si volias ’na melhor mesura, que ’nanessa pus viste, valia mielhs conhar lo termometre dins ta gòrja. Mas lo mielhs qu’eria de lo conhar dins ton « rectum ». Dins tau cas, folia prener de las percaucions : d’en prumier bien lubrifiar la sonda emb de la vaseline e la far entrar bravament nonmas d’1 centimetre dins ton cròs de cuòu. E ben mas : me siria pas jamai vengut a l’eidéia de l’i conhar lo termometre tot entier…
Si per cas volias ’chaptar lo parier termometre que lo meu, te balhe l’adreça dau fabricant, segur n’especialista dau COVID :
Fabricant : Hangzou Sejoy Electronics & Instruments Co., Ltd. Building 2, No.202,
Zhenzhong Road, West Lake Economy & Techonoly Zone 310030…
Hangzhou, CHINE