« Vam tots crebar ! Qu’es pas benleu, qu’es segur ! »…
Lo COVID es pertot. Te cercla. Po’es pas t’enfugir : ses confinat… Quand as pro virat de çai de lai dins ton apartament, ’lumas la tele per te gardar d’einuiar. Mas t’enflute, l’i veses mas dau monde que s’esbracien e que s’esbabinhen : … lo virus e clapetis e clapetas… lo coronavirus e bri bri bri e grà grà grà… lo Covid-19 e patali e patalà… Lo diable mai ton virus. Te fan quitament veire un grand angard qu’an ’dobat per puescher l’i entrepausar de las centenas de caissas en atendis de las ’menar au cementerí, e, subra quincaròla, l’i an metut la climatisacion perfin que los cadabres l’i se bonhessan pas tròp redde. Fin finala tuas lo pòste perque ’chabarias per venir borrinos.
Per te reconfortar ’trapas lo jornau. Mas qu’es pas mielhs : vas dau diable a l’Aversier ! ’Na granda fotò ten tota la prumiera paja : doas siloetas emmalhonadas de bleu de pè en testa, ’na que butis un charriòt dins-t’un colidor, ’n’autra per costat que ten un gota per gota, e l’i traveses quauqu’un mai sus un liech, malhat de tots los costats ; sabes pas si qu’es n’òme o ’na femna mas de tots biais, que siaïe l’un o l’autre, se veu plan que qu’es quauqu’un de grolaud, de bien malaude. Lo paubre grapaud a ’trapat lo virus : a pus d’alen e fau lo ’menar en granda preissa dins lo servici de reanimacion que l’i aura tot çò que fau per li eschivar d’estofar.
Sus la paja d’apres, te fan lo descompte daus mòrts e, per cas que voldrias pas zo creure, totas las setmanas fan un grafique per mielhs te far veire la « cinétique de l’épidémie » ; mai si sabes pas çò que diable es la « cinétique », comprenes totparier que l’i a tots los jorns de mai en mai de monde que l’i passen. Lo pieg, qu’es dins las maisons de retirada : ’n’ecatomba ! Quand, coma me, vas pas punhar ’trapar los 81 (ans), as tòst fach de virar la paja !
Pensas que podras te desnuiar en legir la rubrica daus « Faits divers »… Mas l’i en a pus de « Faits divers » : las veituras pòden pus se sacar emper que qu’es defendut de navigar e los raubaires pòden pus raubar emper que lo monde son confinats chas ilhs… A penas quauquas linhas per te dire que n’eissorlat a fotut lo fuec a sa maison, mas qu’es ben tot. E ’quò torna far emb lo virus. Tot vai de travers : l’i pas pro de « soignants », pas pro materiau, pas pro ospitaus, pas pro ’quò-’quí o ’quò-lai, lo monde s’enduren pus chas ilhs e, donat que saben pas qué far, se bregen e l’i aura segur « des séquelles sur le plan psychologique », « l’économie française est en récession », lo « Conseil scientifique » se presima, mas de tot biais lo monde es enfecit e quitament un tigre a ’trapat la malaudia.
A la paja 8 lo Maira te ditz que data d’anuech si suertes sens ton masque ’traparas un procès verbau ; mas lo President dau Conselh Generau te ditz a la paja 9 que per lo moment l’i en a pas, de masques, mas van benleu pas punhar ’ribar. Benleu. Mas pas segur. En atendis po’es te’n bricolas un ; l’i a ren de pus ’cepte : as mas de segre las explicacions que te balhen a la paja 10. As pas de machina de coser ? Pff ! L’i ses pas fòrta sus la costura ? Pff ! Un pitit de tres ans zo saubria far… ’Laidonc ’nam-l’i. Per començar, te disen çò que te fai mestier : ’na gulha, dau fiau, de l’espinlas, daus ciseus, dos, tres bocins de petassons los uns mai espès que los autres, de l’elasticle o, si n’as pas, quauque ligon fara l’afar. Un còp qu’as ’semblat tot lo forbin, po’es te lançar. As mas de segre las indicacions. L’i me lancei.
Per lo 1, « Découper les tissus selon le patron » prenguei bien garda de copar large d’un centimetre de mai per lo dejos e 2 centimetres per lo dessus, coma disian. ’Quò poguet ’nar.
Comencei de m’embraulhar au 2 : « Coudre ces pièces deux par deux » ; disian de coser en « dégarnissant la couture du milieu de l’excédent de tissu » e ’quí e lai, e qu’a la fin avias tres peças. Sabe pas coma avia fach mon compte : ne’n avia mas una. ’Laidonc qu’eria pas ’cepte far lo 3 : « Coudre les 3 pièces ensemble en haut et en bas ». Tant pieg : cosei ma peça totparier. La virei a l’endrech coma disian de fach au 4, e faguei un rabat d’un centimetre « cousu en zig-zag sur les côtés » coma disian au 5 per puescher l’i far goletar l’elasticle coma disian au 6.
Un còp mon trabalh ’chabat, agachei mon chap d’òbra. Per bien dire, marcava mau. Semblava p’un piau lo modele… Me calculei un brave moment ente diable avia pogut me trompar. ’Chabei per comprener : lo patron, afen lo modele, balhava mas la meitat d’un masque e folia decopar l’autra drech a drech ! ’Quò fai qu’avia mas fach la meitat d’un masque que me parava mas la meitat de la figura ! Mas me pensei que si avia mestier de surtir, l’esmenda que riscava ’trapar siria pas de meitat…
Me’n suvendrei dau COVID-19 !